جمعہ، 7 ستمبر، 2012

جب بھی کوئی شخص محبت سے مجھے دیکھتا ہے۔۔۔ سعید عاصم

جب بھی کوئی شخص محبت سے مجھے دیکھتا ہے
میرا حاسد بڑی حیرت سے مجھے دیکھتا ہے

ہر کوئی کب یہ سمجھتا ہے کہ میں اچھا ہوں
ہر کوئی اپنی بصارت سے مجھے دیکھتا ہے

جانے کیا خوبی اُسے مجھ میں نظر آتی ہے
جب بھی ملتا ہے وہ چاہت سے مجھے دیکھتا ہے

عمر بھر جس نے کیا میرے کردار پہ شک
اب وہی شخص عقیدت سے مجھے دیکھتا ہے

خوش رہے وہ بھی جو کرتا ہے محبت مجھ سے
خوش رہے وہ بھی جو نفرت سے مجھے دیکھتا ہے